- Galdetegia irailaren 13 arte egongo da betetzeko moduan www.durango.eus Parte Hartu webgunean. Ondoren, parte-hartze saio gehiago egingo dira emakume taldeekin eta ikastetxeekin. Herritarren ekarpenak aztertu ostean, babesleku klimatikoen sarearen mapak eguneratuko dira, eta behin betiko sarea urria inguruan onartzea aurreikusten da.
Durangoko Udalak Babesleku Klimatikoak Proiektua garatzen jarraitzen du. Ekimena joan den martxoan jarri zen abian, tenperatura altuko egoeretan herritarrek erosotasun termikoa bermatzeko espazio irisgarri eta seguruen sarea sortzeko.
Proiektuaren abiapuntua udalerriaren diagnostiko klimatiko bat da, bero-boladen aurrean zaurgarritasun ertaina adierazten duena. Era berean, egiaztatu da beroaren inpaktua ez dela uniformea Durangon, eragin handiagoa baitu itzalik ez duten eta eguzkiaren eragin zuzena jasaten duten eremuetan. Egoera horren aurrean, Udalak babesleku klimatikoen sare bat sortzea bultzatzen du, bero handiko aldietan espazio fresko eta seguruak bermatzeko, arreta berezia jarriz kolektibo zaurgarrienei, hala nola adinekoei eta haurrei.
Babesleku klimatikoak sarrera libre eta doakoak izango diren espazioak izango dira, eta biztanleria dentsitate handiko eremuetan kokatuko dira. Espazio horiek edateko ura, atsedenlekuak eta seinaleztapen egokia izango dituzte, errazago identifikatzeko. Barneko espazioen kasuan, tenperatura 26 ºC-tik behera mantenduko da; kanpoko espazioetan, berriz, itzala eta aireztapen naturala duten eremuak lehenetsiko dira. Maiatzetik urrira bitartean erabiltzea aurreikusten da, batez ere bero handieneko uneetan.
Prozesu horren esparruan, ekainean eta uztailean herritarren parte-hartzerako hainbat saio egin dira, herritarren eta tokiko eragileen ekarpenak jasotzeko eta etorkizuneko babesleku klimatikoen sarea diseinatzen laguntzeko. Saio horiek San Fausto baselizan, Madalena ermitan, Otamotzena Auzogunean eta Laubideta 6an (Intxaurrondo) egin ziren, eta udalerriko auzo eta eremuei lotutako ikuspuntu eta behar desberdinak txertatzea ahalbidetu dute.
Saio horiek amaitu ondoren, Udalak parte-hartze prozesuarekin jarraituko du, ekarpenak biltzen eta proposamena osatzen jarraitzeko. Horretarako, online galdetegi bat prestatu da, uda osoan zehar eskuragarri egongo dena www.durango.eus webgunean, iraileko lehen ostiralera arte. Horrela, ekarpenak egin nahi dituzten herritar guztiek parte hartzeko aukera izango dute.
Gainera, irailean parte hartzeko beste saio batzuk egingo dira, kolektibo jakin batzuei zuzenduta. Alde batetik, emakume taldeekin bilera bat antolatuko da, eta, bestetik, ikastetxeei zuzendutako saio bat egingo da, haien ekarpenak eta beharrak babesleku klimatikoen sarearen diseinuan txertatzeko.
Parte-hartze fase hau amaitu ondoren, Udalak jasotako ekarpen guztiak aztertuko ditu eta hasierako proposamena eguneratuko du. Lan horren barruan, babesleku klimatikoen mapen bertsio berriak prestatuko dira, eta orain arte identifikatutako espazioen zerrenda kontrastatuko da.
Berrikuspen prozesu hori amaitu ondoren, aurreikusita dago urria inguruan Durangoko babesleku klimatikoen zerrenda ofiziala onartzea, proiektua osatuko duten espazioen behin betiko sarea definituz.
Parte-hartze prozesu horren bidez, Durangoko Udalak udalerriaren benetako beharretara egokitutako babesleku klimatikoen sarea diseinatzen jarraitzen du, herritarren eta tokiko eragileen parte-hartzearekin eraikitako proiektua izanik.
