- Lehen balantzeak egunean batez beste 175 erabiltzaileko muga erakusten du, eta 16:30eko ordu-tartea ezartzen du erabilera handieneko une gisa, 507 erregistrotik gora bilduta. Tabirako igerilekuetakoa da bidaia gehien jaso dituen geltokia, eta 15 urtetik beherako neskak % 37 zein mutilak % 29 dira bidaiari talderik ugarienak.
Joan den uztailaren 1ean hasi zen martxan DurangoBus, Durangoko hiri-autobus zerbitzu berria. Funtzionamenduko lehen hamabost egunak igarota, bildutako datuek zerbitzuaren erabilerari buruzko lehen balantzea egiteko bidea ematen dute.
Aldi horretan, DurangoBusek 1.921 bidaiari erregistratu ditu guztira; hau da, egunean, batez beste, 175 erabiltzaile. Zerbitzua astelehenetik ostiralera eskaintzen da, 11:00etatik 14:30era eta 16:30etik 21:00etara, 40 minutuko maiztasunarekin. Ordu-tarteei dagokienez, 16:30ean pilatzen da eskaera handiena, 507 kiderekin.
Ibilbide zirkularrak Madalena eta Tabira Ibaizabalgo eremua lotzen ditu, eta udalerriko hainbat auzori ematen die zerbitzua. Datuek erakusten dutenez, Tabirako igerilekuetako geltokia da erabiliena, 856 bidaiarekin; ondoren Madalena dago, Landako etorbidean, 709rekin, eta, hirugarren, Olleria, 162rekin. Jarraian daude Zirarmendieta 6, 60 bidaiarekin; Pagasarri kalea, Otamotzenako eremuan, 52rekin; Faustebide kalea, 22rekin; Zumar kalea 4, 13rekin; San Rokebidea, Kurutziaga ikastolaren inguruan, 12rekin; Larrasoloeta kalea, 10ekin; Frai Juan Zumarraga 23, 10ekin; Sasikoa kalea 28, 6rekin; Arriluzeaga kalea 4, 5ekin; eta Arriluzeaga kalea 11, 4rekin.
Erabiltzaileen profilari dagokionez, talderik ugariena 15 urtetik beherako neskena da, 789 pertsonarekin (% 41,1), eta ondoren mutilena, 542rekin (% 28,2). Jarraian, emakume helduak daude, 325 pertsonarekin (% 16,9); hirugarren adineko emakumeak, 101 pertsonarekin (% 5,3); gizon helduak, 121 pertsonarekin (% 6,3); eta hirugarren adineko gizonak, 43 pertsonarekin (% 2,2).
Lehen balantze horrek DurangoBusek funtzionamenduaren lehen asteetan izan duen erabilera ezagutzeko aukera ematen du, eskaera handiena duten geltokiak, erabilera handieneko ordu-tarteak eta erabiltzaileen profila identifikatuz.
Ekimena hilabeteko esperientzia pilotu gisa planteatzen da, uztailaren 31ra arte, zerbitzuaren funtzionamendua ebaluatzeko, ordutegien egokitasuna aztertzeko eta udalerriko auzo desberdinetan dagoen eskaria ezagutzeko. Probaldia amaitu eta lortutako emaitzak aztertu ondoren, Udalak modu iraunkorrean ezartzearen bideragarritasuna baloratuko du.
