Egitura ekonomikoa
25 otsaila 2022


Aurrekontu orokorren egiturak diru-sarrera eta gastuen izaera ekonomikoa hartzen du aintzat, eta lortu nahi diren helburu eta xedeak.

Era berean, honela sailkatzen dira: ohiko eragiketak, kapital eragiketak eta finantza eragiketak.

A. Diru sarreren egoera 

Diru-sarreren egoera-orriaren egituran ohiko, kapital eta finantza eragiketen ondoriozko aurreikuspenak bereizten dira.

Ohiko eragiketak

  • Zuzeneko zergak: Ekonomi edo famili zirkunstantzien arabera galdatzen diren ordainketak dira (adibidez, Ondasun Higiezinen gaineko Zerga -OHZ- , Trakzio Mekanikozko Ibilgailuen Zerga -TMIZ- edo Ekonomia-Jardueren gaineko Zerga -EJZ-).-
     
  • Zeharkako zergak: Kontsumoa zergapetzen duten ordainketak dira, hura egiten duena eta haren zirkunstantziak zeinahi direlarik ere (adibidez, Eraikuntza, Instalazio eta Obren gaineko Zerga -EIOZ-).
     
  • Tasak, prezio publikoak eta bestelako diru-sarrerak: Erabiltzaileek zuzeneko onura dakarkieten zerbitzu publiko eta jardueren truke egiten dituzten ordainketak dira (adibidez, zabor bilketa zerbitzua edota TAO).
     
  • Ohiko transferentziak eta diru-laguntzak: Besteek, batez ere Administrazio Publikoek, Udalari ohiko gastuetarako egiten dizkioten ekarpenak dira (adibidez, Udalkutxako ekarpena).
     
  • Ondare-sarrerak: Udalaren ondasunek ematen dituzten errentak eta enpresa publikoen irabaziak (adibidez, administrazio emakidak edo alokairuak).

Kapital-eragiketak

  • Inbertsioak besterentzea: Udal lursailak eta bestelako ondasun higiezinak besterentzearen ondorio diren diru-sarrerak.
     
  • Kapital transferentziak eta diru-laguntzak: Besteek, batez ere Administrazio Publikoek, Udalari inbertsio gastuak finantzatzeko egiten dizkioten ekarpenak dira.

Finantza-eragiketak

  • Finantza-aktiboak: Finantza-eragiketen ondorio diren diru-sarrerak.
     
  • Finantza-pasiboak: Orokorki, inbertsioak finantzatzeko eskatutako maileguen sarrerak dira.

B. Gastuen egoera

Gastuen Egoera-orriaren egitura ekonomikoan ohiko, kapital eta finantza eragiketetarako kredituak bereizten dira.

Ohiko eragiketak

  • Langileak: Langile publikoen gastuak dira (soldata, ordainsaria eta gastu sozialak).
     
  • Ohiko ondasun eta zerbitzuak: Herritarrei funtsezko zerbitzuak (adibidez, argiteria, ura, edota garbiketa) emateak berekin dakartzan gastuak dira.
     
  • Finantza-gastuak: Hitzartutako maileguen interesak eta bestelako finantza gastuak dira (adibidez, komisioak).
     
  • Ohiko transferentziak eta diru-laguntzak: Udalak besteri laguntza edo diru-laguntza gisa ematen dizkien diru-kopuruak dira.

Kapital-eragiketak

  • Benetako inbertsioak: Obra eta azpiegiturak egiteko beharrezko diren gastuak.
     
  • Kapital-transferentziak eta diru-laguntzak: Udalak beste erakunde batzuei benetako inbertsioetarako egiten dizkien ekarpenak.

Finatza-eragiketak

  • Finantza-aktiboak: Finantza-eragiketak dira (adibidez, maileguak besteri edota fidantzak).
     
  • Finantza-pasiboak: Orokorki, inbertsioak finantzatzeko eskatutako maileguen gastuak dira, hau da, maileguen amortizazioa.